// 主題信息

要錢?要命?

  • 0
  • 0
  • 00:22:09
世界不斷向我們灌輸它的價值觀,加上我們的罪性,形成我們習以為常的取向。面對職場處境,你的本能反應是甚麼?「錢」途是否必定世俗、聖工是否必然神聖?十架之路是全然捨棄、順服跟從,是真正的生命之路。
 

要錢定要命?你會(A)比曬啲錢我,(B)唔洗諗當然要保住啲錢,(C)諗盡辦法兩樣都要呢?我估,如果有得揀,我都會諗下點至可以唔比人搶走啲錢。又要錢又要命,係我哋心底嘅寫照。

 年輕嘅時候,我本科讀會計,畢業後喺加拿大嘅會計師事務所工作。嗰度係一間國際嘅大會計師樓之一,每年都會聘請大約百幾位畢業生。我當時就同大家一齊入公司,一面工作一面考專業會計師試。我哋要考試又要去暑期嘅密集班,最後參加每年嘅全加拿大公開試,通過後再做滿兩年,就會成為會計師。

 可以想像,每年咁多人一齊考試,加上公司制度係每年會升一級,考倒試嘅話人工更會加唔少,所以每年考試嘅放榜日係公司嘅盛事,大家都注意著邊個同事考倒、邊個肥佬。公司喺呢日會比所有嗰年嘅考生放一日特別假,然後放榜嘅方式,當年互聯網仲未流行,考生會喺一個特定時間,打電話去問結果。公司有個約定文化,如果你考到,就會出現喺公司為大家預備嘅慶祝酒會,如果考唔倒,就自動唔好出現,下星期返工至見。

 於是當日嘅我戰戰競競咁,經過一輪忐忑,終於夠鐘打電話,問倒原來自己過咗關,於是好高興咁去出席慶祝會。就喺入去慶祝會門口,每一個順利過關嘅同事都會收到一件T-恤,呢件珍貴嘅紀念品,我留到今日,就係呢件…上面寫著:”Who says you can’t have it all!” 你得咗喇!邊個話你唔可以賺得全世界!

 對於一個努力咗好耐,對結果患得患失嘅年輕人,呢句說話實在係好大嘅鼓勵。可能你嗰行都有潛在嘅鼓勵方式,叫你跟佢嘅價值觀不斷追求。會計師嘅工作係日以繼夜嘅,我最高記錄喺香港做嘢時,一連三日24小時冇瞓過。雖然目的都唔係要搵咩大錢,只係好盲目咁做做做,但係要錢唔要命,似乎係我當時嘅寫照。

 聖經話:「人若賺得全世界,賠上自己的生命,有什麼益處呢?人還能拿什麼換生命呢?」(太16:26) 呢句好似好應景嘅經文,對於唔做就養唔起屋企嘅人,又點樣解決問題呢?其實聖經金句並唔係解決問題嘅藥方,記得曾經有一位年輕嘅姊妹,當佢知道我都係會計出身,特別走黎問我:佢剛入職,日做夜做,返唔倒教會,所有弟兄姊妹都叫佢唔好做,點算?

 我同佢講,只有佢自己可以答倒呢個問題。因為佢要對準耶穌嘅帶領,如果上帝將佢放喺會計界,咁就面對眼前嘅挑戰,經過感覺被壓詐嘅日子,學識呢個專業,長遠唔好做一個壓詐人嘅上司。如果我哋一面對困難就放棄,咁永遠都只會停留喺扭曲制度嘅底層,無法子經歷信仰喺絶望當中嘅真實,同上帝為我哋開嘅出路。

 不過呢句經文又點呢,命都冇日做夜做去賺取全世界,咪就係經文叫我哋唔好做嘅囉?睇番經文嘅處境:耶穌話比門徒聽,佢要去耶路撒冷,受長老、祭司長、文士許多的苦,並且被殺,第三日復活。彼得就拉著佢,勸佢:主啊,萬不可如此!這事必不臨到你身上。耶穌轉過來,對彼得說:撒但,退我後邊去吧!你是絆我腳的;因為你不體貼神的意思,只體貼人的意思。「25於是耶穌對門徒說:若有人要跟從我,就當捨己,背起他的十字架來跟從我。因為,凡要救自己生命的,必喪掉生命;凡為我喪掉生命的,必得著生命。」(太16:25)

 耶穌講嘅係物質世界同屬靈生命嘅對比。經文講賺得全世界,針對門徒諗緊嘅、耶穌將會做地上嘅君王,復興以色列國。所以賺得全世界,係統治地上世界嘅意思。你同我嘅自然傾向,都好似彼得咁,叫耶穌唔好死,想見倒得到世界,更加唔想跟住佢去死。我哋要錢又要命,仲認為咁至最有智慧。

 經文嘅重點係叫我哋:捨己,背起十字架跟從耶穌。所以,唔好著眼世界嘅王權、名利,要捨棄呢一切、徹底捨棄舊我,唔係咩都唔做喎,係跟住耶穌基督,走上十字架痛苦嘅路。呢個使命更加難、要求比我哋嘅能力更加高,而職場就係挑戰我哋能否辨別真理,面對世界嘅價值觀、我哋自己內心嘅慾望同自然反應,仍然願意捨己跟從嘅地方。

今日,我好多時仍然會一星期做足七日:教書、開會、講道… 仲比以前做生意更加困身。可能你會認為,以前自己做,而家為神做嘛。不過其實我察覺到,並唔一定係咁。以前日做夜做,都曾經有好崇高嘅理想,要幫身邊嘅同事,當日我嘅上司,到今日佢都已經好多年冇做嘢,佢搵倒工作以外嘅生活,亦都仍然係我嘅好朋友,間中會傾下信仰。

 記得後來我自己做生意,有一位同事,最初黎係做文字輸入嘅暑期工。佢性格特別,但係我個同事形容佢係快打手,所以請咗佢。後來我哋發現佢其實唔係學生,於是暑假後繼續請佢做嘢。記得當時同事同我講,人工照舊得啦,佢唔會搵倒其他工。不過我話,暑期工係學嘢只有車馬費,長工嘅話,我哋應該比佢合理嘅人工。當年最令我難忘嘅,反而唔係賺幾多,而係同一班年輕同事一齊打江山嘅喜悅。

 所以對我黎講,職場、機構、堂會,不同嘅場景都可以世俗或神聖,關鍵是當中的人。今日日做夜做,工作本質上就似乎直接服侍上帝之餘,但我都要好小心,唔好因為知識或者其他人嘅目光,就失去服侍上帝嘅焦點。

 要錢定要命?我會形容今日我嘅工作:冇錢又冇命。冇錢,當然都只係相對嘅。財富產業,足夠就可以了。冇命,係命都唔要嘅意思。背起十字架跟隨主,就係命都唔要嘅呼召。

 聖經話:「有一條路,人以為正,至終成為死亡之路。」(箴14:12,16:25) 要錢定要命?信耶穌、認識主,並唔係頭腦嘅相信,而係整個人生都會因為跟隨主耶穌而徹底改變。你是否願意放下本能反應,跟隨耶穌,走這另類的生命之路?

  • 李適清 博士

    李適清博士早年修讀會計,獲加拿大特許會計師資格。她先後於加拿大和香港從事審計及商務顧問工作,並於1997年創辦商務顧問公司,為企業提供融資顧問服務;期間曾任香港及澳大利亞上市公司董事、科技公司首席執行官等職。2002年,李博士離開職場,進修心理學及神學;2006年在中國神學研究院畢業後,於香港浸信教會擔任傳道,其後赴英深造,專注於神學與經濟學之跨學科研究;2010年加入中國神學研究院事奉;現在亦為香港浸信教會部分時間義務傳道。

    李博士是少數能結合神學、經濟學及創業經驗的神學家。她的負擔是讓神學恰當地應用到信徒的生活中,尤其在職場領域及社會文化中。李博士著作有The Two Pillars of the Market 、《市場聖約──神學與經濟學的對話》、《職場繁星》及《職場會幕》。



0 評論 0 分享

Post comment as a guest

0
  • 暫時沒有評論。