// 故事分享

當跑的路

  • 0
  • 0
  • 00:15:21
回望過去3個生命的片段,箇中體驗到上帝在我身上的工作。我的故事很平凡,不過是一些工作上倫理道德的挑戰,而我就在這些挑戰當中不停揀怎樣去回應上帝,向左走或向右走,基督徒的生命就在這些選擇裡面呈現。可能就在我選擇怎樣去回應上帝時,我的召命慢慢就揭露出來。
 

第一個片段:大家先望一望呢一個名牌。呢個名牌係我一個好重要的記號。當時第一次上Jean老師的堂,讀咗一科「職場牧養與實踐」,箇中去咗一個三日兩夜嘅營會,一直帶住呢個名牌。我哋一班同學自由選擇營會內的服侍崗位,我揀了「真情對話」,打算上台分享職場的經歷。

 原本我只係打算分享返工壓力好大,老闆好橫蠻、好強權,令到我成為驚弓之鳥,連早餐都食唔落。點知,事前同老師與及另外兩個同學一齊預備時,俾老師問吓問吓撩起咗一個以往沒有察覺的問題。好記得老師當時問我:「你老闆咁強勢,如果老闆要你做d你覺得唔啱嘅野,咁你點算?」各位同學,換轉是你會點答呢?如果老闆要你做d你覺得唔啱嘅野,咁你點算?我當時好似撞咗邪咁,竟然毫無掩飾,幾乎不假思索話我會照做。「順服是僕人生命的血液」,不過我所順服的是老闆命令。我的問題就是對老闆唯命是從,即使係唔符合聖經原則的, 也會照做如儀。

 我自己唔察覺這罪,但老師好好,無話得過且過,眼不見為乾淨,將罪收埋係地毯底就算數,而係同我同行,一齊處理呢個生命的盲點。

 入Camp前再傾。嗰一晚係中神好熱、無風、翳焗,坐得耐都出汗,老師和我地三個同學討論咗好耐,傾到學校都要熄燈關門喇,老師最終決定唔俾我上台分享生命,免得激勵唔到台下的弟兄姊妹,也矇騙了自己,以為收起呢一部份的自己、present另一部份的自己就可以胡混過關,暪天過海。

 當時得知老師的決定,個腦天旋地轉,非常之難受。我問自己:「係唔係因為我唔好,所以唔接納我呀?」上唔上台分享不過是小事,但心坎裡最難受的,潛藏已久的罪被揭穿了,覺得無地自容。

 回望呢個片段,我諗起「葡萄樹與枝子」的比喻。經文話:「凡結果子的,祂就修理乾淨,使枝子結果子更多。」上帝呢一下修剪,可以話擊中要害,傾刻間血流如注,心如刀割。係嗰三日兩夜的營會裡,我痛定思痛,寫咗一封信俾天父,立志在職場忠心跟隨耶穌,堅守真理價值,不過,「我信但我信不足」,仍舊懼怕膽怯。我祈求主賜我勇氣,敢於說不,在職場敬畏上帝而非老細。

 我感激Jean老師。呢次的學習好寶貴!幫我睇到生命的盲點,對自己的過犯有所醒悟。就係咁我走上呢條倫理道德挑戰的路。

 第二個片段,係營會立志之後無幾耐,我遇上一個機會去試一試。嗰個係向客戶額外收取success fee的挑戰,即係成功幫客戶慳稅,就分番幾個百分比。我查過香港會計師公會的指引,係某d特定的情況下原來係可以收success fee,而呢個case就符合條件。但是信仰同時要求我考慮收費模式是否雙方都公平而有利。究竟跟從《聖經》的價值觀而唔按照行規辦事,真是行得通嗎?我決定試下同老闆講我唔做呢個case,覺得收success fee對個客唔公平。其實我都唔識點樣同老闆解釋我的決定和看法,唯有深深咁吸一口氣,心諗聖靈引導我講咩就講咩啦!結果老闆竟然接納我say no,仲好緊張去翻查會計師公會的指引,睇吓收success fee有冇違反專業操守。原來我可以放心,勝過世界的,是上帝,佢係王,早已掌權。

 我就是咁樣俾上帝帶住走上呢條當跑的路,由上唔到台分享的低谷,到真實體驗上帝的保守和得勝。聖經的教導由抽象冷冰的文字,轉化成實戰的經驗、由衷的體會。呢個就係我在職場向住天父奔跑的起始點 (或者話係我的轉捩點),而天父特別安放俾我的崗位,係稅務顧問,一個充滿倫理道德挑戰的位置。而我在不斷尋找召命中,見到上帝的作為、見到內裡有一部份的自己俾上帝陶造緊;佢要我企穩,為佢作見證。

 不過要企穩,好唔客易,當中有好多掙扎,有時候有勇氣講出自己的諗法和立場,唔係必然的事。第三個片段是我形容為一個失敗的例子:試過有一次,我同老闆對一單case要修改之前年度的帳目有分歧。

 為咗幫個客慳稅,老闆於是建議個客修改帳目,但我認為要修改帳目,一定要提出充份的證據證實之前有錯先得,唔可以隨便話改就改,於是入老闆房拗咗一輪。但老闆斷然拒絕,話改咗帳目先,等將來稅局問到才呈交證據。我之後再入房,痛陳利弊,並且提出一個可行方案,等到個客搵到證據先至交帳目去稅局,但老闆仍然一意孤行,一定要改。我覺得不對,但無可奈何遵從……

 那晚當我根據老闆的指示去做,預備呈交去稅局的文件時,我覺得提筆千斤重 ,同時亦覺得好沮喪:我已經扭盡六壬去勸我老闆,但佢都係唔聽。點解自己咁冇用呢?點解堅持唔到自己的立場呢?要做一d過唔到自己的事,原來內心撕裂得好緊要。係第一個片段老師正正就係問我:「假如老闆要你做d你覺得唔啱嘅野,咁你點算?」

 我睇到自己的失敗和限制:當我以為跟緊上帝行呢條「當跑的路」,原來我不是一直向前行,可以有時勇敢行前一步,有時軟弱倒退兩步。呢條不是一條直路、永遠向前,而係曲折而迂迴,好似「明陣」咁。自己軟弱、有限,唔係幾靠得住,曾經拍哂心口立志話企穩,結果未又係聽老闆的命令...

 呢個片段出人意外的地方,係翌日老闆一返到公司就跑來我個位到「禁」住我,話「都係唔好改盤數住,因為咁咁咁的原因,其實咁做好危險...」老闆不愧係老闆,佢講嗰個原因同危機,係我之前果日係諗唔到,但係老闆接納我的方案,等個客提出充份證據先至修改帳目,而最終亦等到個客咁做。真係奇妙呀!我再一次經歷上帝奇妙的介入,我由衷禱告感謝主。

回望這三個片段,我睇到當中有進程:由第一片段我唯命是從,對呢d倫理道德的警覺性awareness係零;第二個片段,我開始嘗試表達我的信仰立場;到第三個片段我會一次又一次同老闆辯論為真理發聲。我聽過好多同學的故事,佢地都在職場上勇敢為人,在掙扎中竭力活出信仰。我都盼望自己能堅定不移,活在神的介入而不是活在其他權勢底下!前面的路可能愈來愈窄、愈來愈難行,但各位同學,讓我地彼此勉勵,在各自當跑的路企穩,一齊為上帝作見證。

  • 游展鴻



0 評論 0 分享

Post comment as a guest

0
  • 暫時沒有評論。